Biyahero ng ‘bato’, nakalawit

Nagawang maaresto ng pulisya ang isang pusakal na tulak ng iligal na droga sa isinagawang anti-illegal drug operation sa Bulacan kamakalawa.

Mga operatiba ng Norzagaray Municipal Police Station (MPS) ang nagkasa ng buy-bust operation sa Brgy. Tigbe, Norzagaray, na nagresulta sa pagkaaresto ni Tirso Rebangus y Guevan alyas “Don-Don”, 41-anyos na residente ng Fatima V, San Jose del Monte City, Bulacan.

Nakumpiska kay alyas “Don-Don” ang tatlong piraso ng selyadong pakete ng plastic na naglalaman ng crystalline substance ng pinaniniwalaang shabu, may timbang na 15 gramo at DDB value na Php165, 920.00, isang piraso ng selyadong plastic na naglalaman ng pinaghihinalaang party drugs at isang Honda click motorcycle na walang plaka.

Ang suspek ay matagal nang minamanmanan ng mga awtoridad sa malawakang pagbibiyahe nito ng shabu sa nasabing barangay at kanugnog-lugar.

Nakakulong na sa Norzagaray MPS Jail ang suspek na nahaharap ngayon sa kasong paglabag sa Sections 5 at 11 Art. 11 ng R.A. 9165 na isasampa sa korte. (MICKA BAUTISTA)