Suspek sa pagpaslang sa dalaga sa Bulacan tiklo

ILANG oras matapos matagpuan ang bangkay ng isang dalaga sa Brgy. Tikay, sa lungsod ng Malolos, lalawigan ng Bulacan, naaresto ang sinasabing salarin sa hot pursuit operation na isinagawa ng pulisya nitong Huwebes, 7 Hulyo.

Kinilala ang suspek na si Darwin Hernandez de Jesus, nasakote sa bahay ng kanyang ina sa Brgy. Tabang, Guiguinto na nabatid na malapit din sa bahay ng biktima.

Hindi na nagawang manlaban ng suspek nang masukol ng magkasanib na puwersa ng pulisya ng Malolos CPS, Guiguinto MPS, at Bulacan PPO.

Itinuturo si De Jesus na pumatay sa biktimang si Princess Dianne Dayor, 24 anyos, ng nabanggit na barangay, nawala noong madaling araw ng Sabado, 2 Hulyo.

Natagpuan ang bangkay ng biktima sa sapa sa Brgy. Tikay, Malolos, nitong Martes, 5 Hulyo, na sinasabing biktima ng pagnanakaw dahil nawala ang mga gamit na iPhone 11 at pitaka na naglalaman ng pera. (MICKA BAUTISTA)