HATAW! D'yaryo ng Bayan hatawtabloid.com
Arestado ang dalawang hinihinalang mga drug peddlers na nagtangkang magbiyahe ng ilegal na droga sa Bulacan sa ikinasang anti-illegal operations ng pulisya sa lalawigan nitong Martes, 14 Hunyo, sa lungsod ng Malolos.
Batay sa ulat ni P/Col. Charlie Cabradilla, acting provincial director ng Bulacan PPO, kinilala ang mga suspek na sina Gerard Pascual, 39 anyos, pedicab driver, residente ng Brgy. Gulod, Novaliches, Quezon City; at Judjane Solivio, 41 anyos, taxi driver, residente ng Western Bicutan, Taguig na nadakip ng mga Intel operatives ng Bulacan PDEU, PIU-Bulacan PPO at Malolos CPS sa ikinasang buybust operation sa Brgy. Mojon, sa nabanggit na lungsod.
Nakumpiska mula sa dalawang suspek ang limang selyadong pakete ng plastic na naglalaman ng hinihinalang shabu na tinatayang may timbang na 50 gramo at nagkakahalaga ng P340,000; at dalawang P500 na ginamit bilang marked money.
Napag-alamang matagal nang tinutugaygayan ang mga awtoridad ang mga kilos ng dalawa dahil mula Metro Manila ay pabalik-balik sila sa Bulacan para magbagsak ng shabu sa mga kliyente nilang drug users.
Kasalukuyan nang detinido ang mg akusado at nahaharap sa mga kasong paglabag sa Section 5, 11, at 26 ng RA 9165 o Comprehensive Drugs Act of 2002 nakatakdang isasampa sa korte. (MICKA BAUTISTA)
