Sa Bataan
P10-M YOSI NASAMSAM

NAREKOBER ng mga tauhan ng Bureau of Customs (BoC) – Port of Limay ang may P10-milyong halaga ng puslit na sigarilyo sa bayan ng Orion, sa lalawigan ng Bataan, nitong Lunes, 6 Hunyo.

Armado ng Letter of Authority (LOA) ni Commissioner Rey Leonardo Guerrero, sinalakay ng BoC-Limay, Enforcement Security Services (ESS), Customs Intelligence and Investigation Service (CIIS), Philippine National Police (PNP) – Orion, at Philippine Coast Guard (PCG) – K9 Unit ang isang tindahan at resort sa bahagi ng Brgy. San Vicente, sa nabanggit na bayan.

Batay ang isinagawang operasyon sa nakuhang impormasyon ng pantalan ukol sa sinasabing kontrabando na ilegal na ibinebenta sa nasabing lugar.

Sa inspeksiyon ng mga awtoridad, tumambad ang 487 master cases ng puslit na sigarilyo kaya agad dinala ang mga kontrabando sa tanggapan ng ahensiya.

Iimbestigahan rin ang mga sangkot na personalidad at ihaharap sa batas para sa case build-up at posibleng pagsasampa ng kasong sa paglabag sa Section 1401 ng RA 10863 o Customs Modernization and Tariff Act (CMTA). (MICKA BAUTISTA)