Misis nakuryente sa mikropono ng videoke, patay

SA halip na kasiyahan ay kamatayan ang sinapit ng isang ginang matapos makuryente sa mikropono ng videoke habang siya ay kumakanta sa bayan ng Casiguran, lalawigan ng Aurora nitong Linggo, 5 Hunyo.

Sa ulat ng Casiguran MPS, kinilala ang biktimang si Mary Jane Macahipay, residente ng Brgy. 1 Poblacion, sa nabanggit na bayan.

Ayon sa salaysay ng asawa ng biktimang si Matt Macahipay, habang sila ay nagkakantahan sa videoke ay nauna na siyang nabiktima ng grounded na mikropono ngunit masuwerte siyang nakaligtas dahil nahila agad ito ng kanyang ina.

Nang dumating ang kanyang asawang si Mary Jane, sa kagustuhan na siya naman ang kumanta ay hinawakan din niya ang mikropono ngunit bigla na siyang nanigas at napasubsob.

Agad isinugod ng mga kamag-anak ang biktima sa pinakamalapit na pagamutan ngunit idineklara nang dead on arrival ng mga manggagamot.

Kasalukuyang iniimbestigahan ng pulisya ang insidente at inaalam kung kakasuhan ng pamilya ang may-ari ng videoke na naging sanhi ng kamatayan ng biktima. (Micka Bautista)