Bea  game makasama si John Lloyd: Sana lang tumugma ang schedule namin

RATED R
ni Rommel Gonzales

MATAPOS ma-unlock ni Bea Alonzo ang panibagong achievement sa pagkakaroon ng 100 vlogs sa kanyang YouTube channel, tila isang bagay pa ang gusto niyang gawin.

Ito ay ang muling makasama sa isang proyekto ang kanyang longtime onscreen partner at premyadong aktor na si John Lloyd Cruz.

Kapag natapos na ang taping ni Bea sa Start-Up Phat kung magtutugma ang schedule nila ng aktor, malaki ang posibilidad na matuloy ang kanilang dream project.

“Lahat ito ay magdedepende pa sa time naming dalawa kung magtutugma at magdedepende pa sa script kung mababasa na ni John Lloyd and if he will agree to doing it. It’s very exciting and nakaka-flatter din kasi kahit na sobrang tagal na naming magkapareha hindi pa rin nawawala ‘yung interes nila sa amin,” pahayag ni Bea.

Ang This Generation’s Movie Queen ay mapapanood sa nalalapit na pagpapalabas ng Philippine adaptation ng hit Korean series na Start-Up, samantalang si John Lloyd naman ay kasalukuyang napapanood bilang bida sa GMA comedy series na Happy ToGetHer.