Dexter Doria 50 taon na sa showbiz, ano nga ba ang sikreto?

SHOWBIZ KONEK
ni Maricris Valdez Nicasio

LIMANGPUNG taon na sa showbiz si Dexter Doria at sa tagal niya rito, ni hindi siya nasangkot sa anumang gulo o kontrobersiya. Napag-usapan lang siya kamakailan nang matapang nitong inihayag na kaya niyang ikuwento ang nalalaman niya sa martial law.

Pero ano nga ba ang sikreto ng isang Dexter Doria at nakatagal siya ng 50 taon sa showbiz?

“Pakikisama talaga is number one,” tugon nito sa digital media conference kamakailan  ng Memories of a Love Story ng Vivamax. “Although marami talagang mga diva na dahil sa sila ay diva kaya naman sila nagtatagal,” dugtong pa ng magaling na aktres.

“Very tricky ‘yan, kasi kapag nagtatagal ka na, rerespetuhin ka rin naman ng mga tao so hindi mo na kailangan na magpaka-diva.

“Para sa akin, galingan mo ang trabaho mo. Expected na ‘yan, gagalingan mo ang trabaho mo at saka hindi ka lang makikisama sa direktor at sa producer, pati sa lahat, pati sa utility because feeling entitled won’t get you anywhere.

“Kailangan talaga na you’re a regular fellow na nagtatrabaho kayo, nagtatrabaho tayong lahat. Pantay-pantay tayo, that is the secret,” aniya.

Super happy naman ang beteranang aktres at nakasama siya Memories of a Love Story dahil  reunion movie nila ito ni Direk Jay Altarejos na siya namang pagbabalik ng direktor sa Viva.

Nagkatrabaho na sina Dexter at Direk Jay sa Memories of Forgetting na tatlong best supporting actress award ang naiuwi ng aktres mula sa Gawad Urian, FAMAS, at Gawad Tanglaw.

“The fact he gave me three best supporting actress awards, parang walang ibang nakagagawa niyan sa ibang directors ko ,and because of that, I have the highest respect for him.

“I cannot describe the fact na kapag si Jay ang tumawag sa akin, talagang nanginginig pa,” nangingitingsabi pa ni Dexter.

Isang LGBTQIA+ ang istorya ng Memories of a Love Story na pinagbibidahan nina Oliver Aquino at Migs Almedras.