HATAW! D'yaryo ng Bayan hatawtabloid.com
NAKOMPISKA ang higit sa P300,000 halaga ng hinihinalang shabu mula sa isang drug suspect sa isinagawang operasyon ng mga awtoridad sa Brgy. San Nicolas, sa bayan ng Minalin, lalawigan ng Pampanga, nitong Sabado, 23 Abril.
Sa ulat mula sa Minalin MPS, kinilala ang suspek na si Alezandro Cunanan, 43 anyos, at residente sa Doña Victoria, Brgy. Dau, Mabalacat.
Bukod sa P360,000 halaga ng drogang shabu, narekober din mula sa suspek ang P1,000 buy bust money, isang cellphone, driver’s license, at isang motorsiklo.
Nabatid, matagal nang minamanmanan si Cunanan dahil sa kaniyang ilegal na gawain at ang kanyang mga suki ay mula sa naturang bayan at mga karatig lugar.
Nahaharap sa reklamong paglabag sa RA 9165 o Comprehensive Dangerous Drugs Act of 2002 ang suspek na nakatakdang isampa sa korte. (MICKA BAUTISTA)
