Vilma naluha nang bumisita sa MET

MA at PA
ni Rommel Placente

SA latest vlog ni Vilma Santos- Recto na ang title ay Balik Metropolitan Theater si Ate Vi (A reunion after 27 years) ay ipinakita niya ang pagbisita sa bagong renovate na Metropolitan Theater (MET), na naging tahanan/venue noon ng musical variety show niyang Vilma, na napanood mula 1986 hanggang 1995.

Nagkita-kita sila roon ng mga dati niyang kasama sa Vilma na sina Chit Guerrero, executive producer ng show; Maribeth Bicharra, choreographer, at Roderick Paulate na  bestfried niya at naging regular co-host sa show.

Isang malakas na tili ang bati nila sa isa’t isa nang magkita sila sa entrance ng MET. At hindi napigilan ni Ate Vi na  maluha nang makita niyang muli ang venue.

Nilibot nila ang buong theater, at pinag-usapan ang mga karanasan nila habang ginagawa nila noon ang Vilma.

Sobrang saya ni Ate Vi  habang tinatingnan ang bawat sulok ng gusali.

Binalikan nila ang ‘di malilimutang experiences, lalo na kapag nakakasalamuha roon ng Star for All Season ang kanyang fans. Isa ito sa mga nami-miss ni Ate Vi.

“Ganoon ko kamahal ‘yung fans. Parang… hindi ko alam kung paano ko susuklian ‘yung pagmamahal nila sa akin. Para magtagal ako sa industriya talaga.

“I just miss my life in showbiz. Nakikita ko silang nahihirapan.

“Imagine, ang iba hindi pa nagla-lunch, nakapila na maaga para makita ka lang.

“Bumibiyahe. May mga nanggagaling sa probinsiya, na dala ang bus nila. Hindi kumakain, knick-knack knick-knacks lang siguro just to see you.

“So, every time dumarating ‘yung sasakyan ko, talagang malaking bagay na ‘yung makamayan ko sila. ‘Yung makita nila ako nang malapit at mahawakan,” pagbabalik-tanaw ni Ate Vi.