Dagul pinoproblema pag-aaral ng 2 anak
(Kita humina sa pagkawala ng TV show)

MA at PA
ni Rommel Placente

DAHIL walang show ngayon sa telebisyon ang komedyanteng si Dagul, naghanap siya ng ibang pagkakakitaan. Nagtatrabaho siya ngayon sa barangay hall ng Montalban, Rizal at siya ang head ng command center ng mga kagawad sa kanilang lugar.

“Maliit ang kita. Hindi naman ganoon kalaki kasi nga sa barangay, ang ibinibigay sa amin honoraria lang,” sabi ni Dagul sa interview sa kanya ni Ogie Diaz para sa vlog nito.

Katuwang din siya ng kanyang misis sa kanilang maliit na sari-sari store. Siya ang nagbabantay kapag abala ang misis niya sa mga gawaing-bahay.

“’Pag wala akong trabaho Sabado, Linggo, rito ako sa bahay. May maliit kaming tindahan.”

Aminado si Dagul na malaki ang pagkakaiba ng kita niya ngayon kompara sa kinikikita niya noong nasa showbiz pa siya. 

Namomroblema siya ngayon dahil hindi na niya matustusan ang edukasyon ng dalawang anak. Maliban dito, may problema rin siya sa kanyang mga paa dahil naka-wheelchair na siya. Hatid-sundo siya ng kanyang isang anak sa barangay hall dahil kailangan siyang buhatin.

“Binubuhat ako ng anak ko para pumasok. 

“Kasi mahina na talaga. ‘Pag tumayo ako, parang nababali siya.

“Siguro overweight o epekto na siguro medyo matanda ka na.”

Ang huling show ni Dagul ay ang Goin’ Bulilit noong 2019 pa. Nang mawala ‘yun sa ere ay hindi na nga siya nagkaroon pa ng show sa TV.