John Lloyd ‘di raw siya Kapuso — May show lang ako sa kanila 

HARD TALK
ni Pilar Mateo

NAKA-ISANG taon na ang itinatag na Crown Artist Management ng magkasintahang Maja Salvador at Rambo Nuñez.

At sa pagdiriwang ng kanilang unang taon, muling ipinakilala ng management ang mga bago pa nilang alaga sa kompanya na ginagabayan ng Mommy ni Rambo na si Marilen Nuñez at Mikki Gonzales (na galing sa ABS-CBN).

Sa tsikahan with the press na kasama nang lumaki ni Rambo at ng kanyang pamilya, nausisa ang binata sa kung paano ba nilang pinili o kinuha ang mga alaga sa kuwadra nila ngayon.

More than anything, ang core ng growing roster of talents nila ay the relationships formed. Wala namang audi-audition pa. Nakikita sa ginagawa nila, bilang influencer, vlogger, director, photographer, designer at iba pa.

Gaya na lang ni John  Lloyd Cruz. Kapwa artista ni Maja. Naidaan lang ang lahat sa usapan. Bukasan ng mga isip. Puso na rin.

Open communications ang pinahahalagahan ni Maja, pati ni Rambo sa pagharap sa sari-sari nilang mga alaga.

Tinanong si JLC kung maitutring ang sariling Kapuso na ngayong ang programang kasama siya na Happy To Get Her ay nasa nasabing estasyon.

Papalakpakan ko si Maja as a manager dahil sa sagot ng aktor. Hindi man direkta eh, tila sinabi nitong hindi siya mamamarkahan na Kapuso.

“I am a Crown Artist Management talent now. May show ako sa GMA-7. I will have projects with them. So, I am independent of any network. Our show is being handled by Direk Bobot (Mortiz). So, it’s between me and direk Bobot. Technically, I am not their contract actor. May show lang ako sa kanila.”

With Bea Alonzo to be paired with Alden Richards soon, looking forward din ang mga follower ni JLC na sana magkaroon din sila ng proyekto ni Bea sa Kapuso. Kahit hindi siya Kapuso!

Bukod kina Maja, Rambo, John Lloyd na artists ng CAM, part of the roster na rin sina Jasmine Curtis-Smith, Miles Ocampo,  DJ Loonyo, Christine Samson, Lauren Reid, Andrei Suleik, Parry Ang, Gino Santos, Yanee Alvarez, Jessie Salvador, at Guel Espina.

Happy Anniversary #CrownArtistManagement.