HATAW! D'yaryo ng Bayan hatawtabloid.com
NAGWAKAS ang pamamayagpag ng dalawang pinaniniwalaang notoryus na personalidad sa droga sa lungsod ng Mabalacat, lalawigan ng Pampanga, nang masakote ng lokal na pulisya nitong Linggo, 6 Marso.
Sa ulat ni P/Lt. Col. Heryl Bruno kay P/Col. Robin King Sarmiento, provincial director ng Pampanga PPO, nagsagawa ang mga operatiba ng Mabalacat City Police Station (CPS) ng anti-illegal drug operation sa bahagi ng Dela Cruz St., Marcon Phase 2, Brgy. Dau, sa naturang lungsod, dakong 1:22 am kamakalawa.
Nagresulta ang operasyon sa pagkakadakip ng dalawang hinihinalang mga tulak ng ilegal na droga na kinilalang sina Edmon Ilan, 41 anyos; at Joey Aguilar, 45 anyos, kapwa mga residente sa nabanggit na lugar at nakatala sa database ng drug personalities.
Nakompiska mula sa mga suspek ang tatlong piraso ng selyadong pakete ng hinihinalang shabu na tinatayang may timbang na apat na gramo at DDB value na P27,200 at isang piraso ng P500 bill na ginamit bilang buy bust money.
Kasalukuyang nasa ilalim ng kustodiya ng Mabalacat CPS ang dalawang suspek habang inihahanda ang pagsasampa ng kasong paglabag sa Section 5 at 11 ng RA 9165 o Comprehensive Dangerous Drugs Act of 2002 sa Mabalacat City Prosecutors’ Office. (MICKA BAUTISTA)
