Tigasing senglot kalaboso sa paglabag ng Omnibus Election Code

NAWALA ang kalasingan ng isang lalaki nang ideretso siya sa selda ng mga awtoridad matapos arestohin dahil sa panghahabol ng saksak sa una niyang nakainuman sa bayan ng Marilao, lalawigan ng Bulacan, nitong Sabado, 5 Marso.

Sa ulat mula kay P/Col. Rommel Ochave, acting provincial director ng Bulacan PNP, kinilala ang suspek na si Eliseo Cammado, Jr., nahaharap sa kasong attempted homicide, nadakip sa Brgy. Patubig, sa naturang bayan.

Sa isinagawang imbestigasyon, nabatid na habang iwinawasiwas ang mahahaba at matatalas na kutsilyo ay kinompronta at tinugis ng suspek ang biktima nang walang kadahi-dahilan matapos ang kanilang inuman.

Kahit lasing ay nagawang kumaripas ng takbo ng biktima at nagsumbong sa mga awtoridad na nagresulta sa pagkaaresto ng suspek.

Nakompiska ng pulisya ang tatlong matatalim na kitchen knives mula kay Camaddo na bukod sa kasong attempted homicide ay nahaharap din ngayon sa paglabag sa Omnibus Election Code. (MICKA BAUTISTA)