Duterte admin maniniguro?
NOGRALES SA CSC HANGGANG 2029

ni ROSE NOVENARIO

ISANG balasahan ang napipintong maganap sa ilang opisyal ng Malacañang, tatlong buwan bago bumaba sa puwesto si Pangulong Rodrigo Duterte.

Nabatid sa mapagkakatiwalaang source, itatalaga ni Pangulong Rodrigo Duterte si Cabinet Secretary at acting Presidential Spokesman Karlo Nograles bilang bagong chairman ng Civil Service Commission (CSC).

Nabakante ang posisyong pinuno ng CSC matapos magretiro noong 2 Pebrero 2022 si Alicia dela Rosa-Bala nang matapos ang kanyang pitong-taong termino.

Si Bala ay itinalaga bilang CSC chairperson ni dating Pangulong Benigno Aquino III noong 2015.

Ibig sabihin, si Nograles ay magsisilbing CSC chairman hanggang 2029.

Idinagdag ng source, si Communications Secretary Martin Andanar ang papalit kay Nograles bilang acting Presidential Spokesman.

Sa kabila nito, mananatili si Andanar bilang kalihim ng Presidential Communications Operations Office (PCOO).