HATAW! D'yaryo ng Bayan hatawtabloid.com
HINDI na kinaya ng isang Vietnamese national ang problemang idinulot ng pagkakautang nang malaki at mga asuntong gawa ng ‘online sabong’ kaya uminon ng silver cleaner upang tapusin ang sariling buhay sa Malabon City.
Batay sa ulat ni P/SSgt. Mark Alcris Caco kay Malabon police chief Col. Albert Barot, dakong 10:00 am ng 16 Pebrero 2022 nang madiskubre ni Romeo Castillo, Jr., 24 anyos, waiter ng Adante St., ang walang buhay na katawan ng biktimang si Nguyen Minh Luan, alyas Jomar Torres Chua, 35 anyos, negosyante, sa loob ng inuupahang apartment sa Brgy. Tañong.
Kaagad ini-report ni Castillo ang pangyayari sa Malabon Police Sub-Station 6 na nagresponde sa naturang lugar kung saan narekober sa pinangyarihan ng insidente ang isang madilaw na likido sa plastic cup na naglalaman ng umano’y silver cleaner.
Dakong 8:00 am ng nasabing petsa nang huling nakitang buhay ang biktima sa kanyang apartment ng saksing si Daisylyn Samonte, 29, vendor.
Sa panayam ni P/SSgt. Caco, sinabi ng isa pang saksi na si Gee kay Legaspi, 42 anyos, at teller ng Pitmaster online sabong na nagkaroon ng maraming utang ang biktima sa iba’t ibang personalidad dahil sa online sabong at problemado aniya dahil sa kasong kriminal na isinampa laban sa kanya na nakabinbin sa Office of City Prosecutor ng Malabon. (ROMMEL SALES)
