HATAW! D'yaryo ng Bayan hatawtabloid.com
MAGKAKASUNOD na nasukol ng mga awtoridad ang tatlong lalaki, kabilang ang dalawang pinaghahanap sa kasong panggagahasa, sa ikinasang anti-criminality operation sa lungsod ng San Jose del Monte, lalawigan ng Bulacan, nitong Sabado, 5 Pebrero.
Sa ulat na ipinadala kay P/Col. Rommel Ochave, acting provincial director ng Bulacan PNP, nadakip ang most wanted person ng lungsod kabilang ang dalawang pinaghahanap na mga kriminal sa serye ng manhunt operations na isinagawa ng tracker team ng San Jose del Monte CPS, 301st MC RMFB, 24th Special Action Force, PHPT Bulacan, at 3rd SOU-Maritime Group.
Kinilala ang mga suspek na sina John Anthony Magsino, alyas TJ, ng Brgy. Kaypian, nakatala bilang most wanted person ng lungsod para sa kasong Rape; Roberto Naval, alyas Turunggoy, ng Bgry. Minuyan 5, para rin sa kasong Rape; at Lito Borcena ng Brgy. Muzon, sa paglabag sa RA 9262 o An Act Defining Violence Against Women and their Children.
Kasalukuyan nang nakapiit ang mga akusado sa custodial facility ng San Jose del Monte CPS at nakatakdang iharap sa korte para sa mga nakabinbing kaso. (MICKA BAUTISTA)
