Mag-asawa timbog sa boga, shabu

ARESTADO ang mag-asawang hinihinalang mga tulak ng ilegal na droga sa ikinasang buy bust operation ng pulisya sa Brgy. Sapang Balas, sa bayan ng Dinalupihan, lalawigan ng Bataan.

Sa ulat mula sa Dinalupihan Municipal Police Station (MPS), kinilala ang mag-asawang sina Diosdado Romero, 54 anyos, at Fatimah Abella na nakuhaan ng apat na maliit na pakete ng hinihinalang shabu, marked money na ginamit sa operasyon, at isang kalibre .38 baril kasama ang mga bala nito na nakalagay sa isang bag.

Aminado ang mag-asawang suspek na gumagamit sila ng ilegal na droga at anila ay naangkat pa nila ito mula sa lungsod ng Caloocan.

Ayon sa mga awtoridad, matapos makatanggap ng impormasyon kaugnay sa ilegal na gawain ng mag-asawa, agad silang nagsagawa ng paniniktik.

Nahaharap sa kasong paglabag sa pinaigting na RA 9165 o Dangerous Drugs Law at Illegal Possession of Firearms and Ammunitions ang mag-asawang suspek. (MICKA BAUTISTA)