HATAW! D'yaryo ng Bayan hatawtabloid.com
ni ROSE NOVENARIO
SENADOR lang ang puhunan ng isang commissioner kaya nasungkit ang puwesto sa Commission kahit kapos ang karanasan bilang abogado.
Isiniwalat ni Commission on Elections (Comelec) Commissioner Rowena Guanzon, na si Commissioner Aimee Ferolino ay hindi sumabak sa paglilitis sa hukuman, hindi nakapagsulat ng pleadings, at desisyon kaya ‘slow’ o mabagal mag-isip.
Noong nakatalagang Election Officer sa Davao, si Ferolino, gusto sana siyang suspendehin dahil sa kaburaraan nang maiwala ang voters’ list sa kanyang pangangalaga. Pinatawan lang siya ng anim-na-buwang multa.
Ang track record ni Ferolino, ayon kay Guanzon, ang dahilan kaya dapat dumaan sa pagrerepaso at panayam sa Judicial and Bar Council (JBC) ang kandidatong commissioner ng poll body.
“They should go to the JBC so that they would be interviewed and review their track record. Look at Commissioner Ferolino, the reason I gave her more allowance than the other commissioner is because she has never practiced law in the court. She has never filed pleadings in court and written decisions and maybe that’s the reason she’s slow,” ani Guanzon sa panayam ng One News.
Inakusahan ni Guanzon si Ferolino noong nakaraang linggo na sinasadyang iantala ang paglalabas ng resolusyon sa disqualification case laban sa anak ng diktador at Partido Federal ng Pilipinas (PFP) presidential bet Ferdinand “Bongbong” Marcos, Jr., bunsod ng kumpas ng isang senador.
Ang naturang senador aniya ang nagrekomenda kay Ferolino para maupong commissioner at todo ang papuri sa kanya nang sumalang sa Commission on Appointments (CA).
Isa si Guanzon sa tatlong miyembro ng First Division ng poll body na magdedesisyon sa consolidated petition laban sa anak ng diktador kaugnay sa 1995 tax evasion case conviction.
Kabilang sa First Division sina Ferolino, at Marlon Casquejo.
Itinalagang ponente ng desisyon sa DQ case laban kay Marcos, Jr., si Ferolino ngunit hindi inilalabas ang resolusyon sa kaso kahit ang deadline ay noon pang 17 Enero 2022 at nakatakdang magretiro si Guanzon sa 2 Pebrero 2022.
Giit ni Guanzon, napagbibintangan na silang nasuhulan kaya hindi naglalabas ng desisyon sa DQ case, kaya’t napilitan siyang ihayag ang desisyon niyang pabor sa pagdiskalipika kay Marcos, Jr., at tawagin ang atensiyon ni Ferolino.
“It never happened before that a ponente has ‘hijacked’ her resolution until a presiding commissioner will retire and therefore defeat my vote to disqualify Marcos, Jr.,” sabi ni Guanzon.
Hindi ‘binibili’ ni Guanzon ang katuwiran ni Ferolino na dinapuan ng CoVid-19 ang abogadong dapat magsulat ng resolution sa DQ case dahil bilang commissioner dapat ay alam niyang mag-akda ng desisyon.
“And then she gave me that excuse of that lawyer has covid. If they have covid, they are not the commissioner. You’re the commissioner, you should be writing the decision,” ani Guanzon.
“If she was not bought, she should release it already. It’s been 20 days and more. How long do you need to write a resolution? All the facts are admitted. Anyway… my golly, it’s a very simple case. I was also the ponente in the disqualification case of Pres. Duterte which I finished on time because it is matter of national interest,” dagdag niya.
“Aniya, hindi naman kandidatong barangay captain ‘yan, sa pagka-presidente ‘yan, hindi mo puwedeng patulugin. Maraming magagalit, maraming magra-rally.
Kahit ako ang Marcos loyalists. Bakit hindi mo pa i-disqualify ngayon? Kasi kapag nanalo ‘yan, tapos na-disqualify ng Supreme Court, he will be remove from office. Magkakagulo. Mga pulpol kayong abogado!” pahayag ni Guanzon.
Ngayong araw, Lunes, 31 Enero 2022, ang deadline na ibinigay ni Guanzon kay Ferolino para ilabas ang resolution sa DQ case ni Marcos, Jr., at kung hindi ito gawin ay isasapubliko niya ang pangalan ng senador na aniya’y ‘nagsususi ‘ sa commissioner.
