Albie desididong ituloy ang sisig date kay Shanaia Gomez

PABONGGAHAN
ni Glen P. Sibongga

AMINADO si Albie Casino na hindi pa natutuloy ang sisig date nila ni Shanaia Gomez, na ipinangako niya online nang ma-evict ang dalaga sa Bahay ni Kuya. Naging malapit ang dalawa nang mapabilang sila sa celebrity housemates ng Pinoy Big Brother: Kumunity Season 10.

“Wala, hindi pa siya nangyayari. Siguro ‘pag bumaba na ‘yung hype, ingay sa amin. We’re so busy now. I am so busy now,” sabi ni Albie sa interview niya sa Star Magic Inside News na mapapanood sa YouTube.

Ngunit desidido si Albie na maipatikim sa kaibigang si Shanaia ang masarap na sisig. Nasabi kasi ng dalaga na hindi nito gusto ang sisig.

“On top of everything, as a friend, feel ko obligation ko ipa-try sa kanya ‘yung masarap na sisig. Kasi napakalungkot naman ng buhay mo kung puro pangit lang na sisig ‘yung natitikman mo,” ani Albie.

Sinabi ni Albie na crush niya si Shanaia. Pero hindi niya pipiliting magustuhan siya ng actress-host dahil sa idinidikta ng kanilang fans.

“She’s a pretty girl naman. Attracted ako sa kanya. Nagulat lang ako, at my age, hindi na big deal ang crush. Sa nakikita ko, masyado pa siyang bata. To be honest, it’s kinda weird. I don’t want to feel her pressured na she has to like me because of the fans.”