Miss India Harnaaz Kaur Sandhu itinanghal na Miss Universe 2021; Urvashi Rautela tinuruang magsayaw ni Marian

RATED R
ni Rommel Gonzales

NAPAINDAK ni Marian Rivera ang kanyang “new friend” na Indian actress at Bollywood star na si Urvashi Rautela na tinuruan niya ng kanyang dance craze na Sabay Sabay Tayo.

Sa Instagram  post ni Marian ay ipinakita ni Marian ang kanilang bonding moment ng co-judge at seatmate na si Urvashi sa 70th Miss Universe preliminary competition sa Eilat, Israel. May caption iyong, ”’Sabay-sabay tayo?’ Me to Urvashi Rautela, my new friend.”

Makikita rin sa Instagram ni Urvashi na proud niyang sinabi na si Marian ang kanyang favorite Filipina actress na sinabing, ”glows like the sun.”

Kasama si Marian sa female selection committee gayundin ang supermodel na sina Adriana Lima at Miss Universe 2016 Iris Mittenaere.

Ipinakita rin ang todo-palakpak si Marian sa stage performance ng pambato ng Pilipinas na si Beatrice Luigi Gomez.

Umabot hanggang sa Top 5 si Bea at si Miss India Harnaaz Kaur Sandhu ang kinoronahang Miss Universe 2021.

Itinanghal namang first runner-up si Nadia Ferreira ng Paraguay at second runner-up si Lalela Mswane ng South Africa.