HATAW! D'yaryo ng Bayan hatawtabloid.com
ISANG linggo nang prehuwisyo ang mga ‘black rice bugs’ o alitangya sa mga residente sa lungsod ng Cabanatuan, lalawigan ng Nueva Ecija.
Ang alitangya ay insektong tila maliliit na salagubang na madalas lumilitaw sa gabi at nagliliparan malapit sa ilaw kung saan may liwanag.
Halos pagbahayan ng mga alitangya ang maraming lugar sa naturang lungsod tulad ng mga karinderya, tindahan, groseya, at maging ATM booths.
Sagabal din sa mga motorista ang mga alitangya na hindi nila makita ang daan dahil kumpol-kumpol na nagliliparan.
Ayon sa mga residente, kakaiba ang amoy ng mga alitangya at masakit kumagat bukod sa kumakapit din sa ulo at katawan.
Sinabi ng mga eksperto na galing sa lupa ang mga alitangya na lumalabas lamang sa tuwing kabilugan ng buwan.
Ayon sa agriculturist na si Nick Angelo De Dios, crop protection coordinator sa lungsod, ang mga alitangya ay peste ng mga palayan na madalas lumalabas tuwing Agosto kapag walang masyadong bagyo.
Ngunit kung may bagyo, lumalabas sila ng Oktubre hanggang Disyembre.
Breeding season umano ngayon ng mga alitangya at nagkataon pang harvest season at full moon sa Cabanatuan kaya dumami ang mga insekto. (MICKA BAUTISTA)
