HATAW! D'yaryo ng Bayan hatawtabloid.com
HINDI nakaligtas sa kamatayan ang driver-bodyguard habang sugatan ang isang kapitan ng barangay nang pagbabarilin ng hindi kilalang mga suspek sa bayan ng Teresa, lalawigan ng Rizal, nitong Linggo ng madaling araw, 14 Nobyembre.
Kinilala ang namatay na biktimang si Renato de Guzman, driver-bodyguard ni Brgy. Captain Allan Abunio ng Brgy. Calawis, Antipolo, dinala sa ospital dahil sa siyam na tama ng bala ng baril sa kanyang katawan.
Base sa tala ng mga awtoridad, sa pagitan ng 4:00 hanggang 5:00 am kahapon, tinambangan ng mga armadong suspek ang mga biktima habang sakay ng itim na Toyota Innova, may plakang NEJ-6854 sa harap ng Amara Restaurant, Sitio Bulak, Brgy. Bagumbayan, sa nabanggit na bayan.
Agad binawian ng buhay si De Guzman habang kritikal ang kondisyon ni Abunio na dinala sa hindi pinangalanang ospital.
Tumakas ang mga suspek sakay ng motorsiklo matapos ang pamamaril patungo sa hindi batid na direksiyon.
Samantala, tikom ang Teresa PNP na magbigay ng komento kung may kinalaman sa politika o may kaaway ang mga biktima na maaaring motibo sa krimen.
(EDWIN MORENO)
