HATAW! D'yaryo ng Bayan hatawtabloid.com
OPERASYONAL na at maaari nang tumawag sa emergency hotline 911 ang mga Bulakenyo para sa anomang uri ng emergency na nangangailangan ng agarang tugon matapos pormal na ilunsad ang Bulacan 911 nitong Linggo ng umaga, 31 Oktubre, sa Bulacan Capitol Gymnasium, sa lungsod ng Malolos.
Sinabi ni Gob. Daniel Fernando, matapos ang matagal na paghihintay, mabilis at madali nang makatatawag nang libre ang mga Bulakenyo sa oras ng sakuna.
“911 is very famous not only in the country at napakadaling tandaan. Kaya binabati ko ang lahat ng ka-partner natin dito para maglaan ng dagliang tugon sa ating mga kababayan 24/7. Ang kailangan kasi natin talaga, mabilis na komunikasyon, maayos na linya ng komunikasyon at mabilisang pagtugon,” ani Fernando.
Pahayag ni PLDT Vice President Dennis G. Magbatoc, pinuno rin ng Corporate Relationship Management-PLDT Enterprise, higit na nagkakaroon sila ng inspirasyon na maging bahagi ng programa dahil maraming mga lokal na pamahalaan ang tumutugon sa panawagan ni Pangulong Rodrigo Roa Duterte na magkaroon ng kani-kanilang lokal na 911 call center para sa emergency.
“Since it was approved na, ang 911 ang magiging nationwide emergency answering point kapalit ng Patrol 117, lalong pinag-ibayo ng PLDT ang pagbuo ng cloud-based contact center platform upang gamitin sa 911 hotline,” saad ni Magbatoc.
Aniya, Bulacan ang pinakabagong nadagdag sa mga lokal na pamahalaang naglunsad na ng 911 hotline kasama ang Puerto Princesa, Palawan, Tarlac City, Bataan, Parañaque City, Olongapo, Ilocos Norte, La Union City, Cagayan de Oro, Negros Occidental, Sorsogon, Legaspi City, Albay, at Baguio City.
Bukod dito, sinabi ni Executive Director Diosdado T. Valeroso ng Emergency 911 National Office sa kanyang mensahe na ibinahagi ni Philip Uy, pinuno ng Capacity Development Emergency 911 National Office, “Harinawa, gawin nating instrumento ang 911 na magdudulot ng kasagutan sa mga agam-agam sa paghingi ng agarang saklolo. Dala namin ang inspirasyon na pag-ibayohin pa ang paglilingkod at pagpapalawak ng 911 sa buong Filipinas.”
Samantala, ibinahagi ni Bokal Alex Castro ang pinagdaanan ng Bulacan 911 mula sa pagbuo ng konsepto hanggang sa paglulunsad nito.
“Ginagawa natin ang lahat para mas matugunan ang mga pangangailangan ng mga Bulakenyo lalo sa panahon ng sakuna na hindi alam kung saan tatakbo. Nagsagawa tayo ng mga pagsasanay para maitulad natin sa international standards and ating mabilisang pagtugon sa emergencies,” ani Castro.
Ang Bulacan 911 ay nasa ilalim ng Bulacan Rescue Project kaya maaari pa rin tawagan ang Bulacan Rescue hotline (044) 791-0566 na nagreresponde sa panahon ng emergency sa lalawigan simula 2010. (MICKA BAUTISTA)
