HATAW! D'yaryo ng Bayan hatawtabloid.com
NAUWI sa trahedya ang masayang panghuhuli ng dagang-bukid ng isang batang lalaki, kasama ang ilang kaibigan, nang maatrasan ng isang traktorang pang-ani at bawian ng buhay sa bayan ng Ramos, sa lalawigan ng Tarlac.
Sa ulat, kinilala ang biktimang si Prudencio Mangaoag, Jr., 7 anyos, residente sa Brgy. Panse, sa nabanggit na bayan.
Nabatid na may kasamang ibang bata ang biktima sa panghuhuli ng dagang-bukid nang mangyari ang trahedya.
Ayon sa pulisya, sinusundan ng mga bata ang traktora dahil naglalabasan ang mga daga kapag nadadaanan nito ang mga pananim.
Sa pahayag ng ina ng biktima na si Luisita, nalaman niya sa mga kalaro ng anak na naatrasan ang bata ng traktora.
Ayon sa operator ng harvester sa pulisya, hindi niya alam na nasa likuran niya ang mga bata kaya nasagasaan niya ang biktima nang umatras siya.
Dahil sa hindi inaasahang pangyayari, napaiyak na lamang ang operator at hindi agad nakagalaw nang malamanng nakaaksidente siya at hindi sinasadyang nakapatay. (MICKA BAUTISTA)
