HATAW! D'yaryo ng Bayan hatawtabloid.com
KASAMA ang 11 asong Shih Tzu sa natupok ng apoy nang makulong sa isang silid nang masunog ang isang tatlong-palapag na gusali sa Tindalo St., Brgy. Villamonte, sa lungsod ng Bacolod, nitong Huwebes, 14 Oktubre.
Ayon kay Fire Chief Insp. Rodel Legaspi, city fire marshal, ilan sa mga aso ang nasa loob ng kanilang kulungan nang magsimula ang sunog pasado 11:00 ng umaga.
Sa imbestigasyon, nasa ibaba ng bahay ang mga may-ari nang maganap ang sunog na maaaring nagsimula sa isang depektibong outlet ng koryente na sinaksakan ng water heater.
Dagdag ni Legaspi, hindi naapektohan ang ibang bahagi ng gusali na gawa sa konkretong materyales.
Bukod sa mga namatay na aso, walang naiulat na nasaktan sa sunog na naapula dakong 12:10 pm.
Tinatayang nasa P100,000 ang halaga ng napinsalang bahagi ng gusali dahil sa sunog.
