HATAW! D'yaryo ng Bayan hatawtabloid.com
NAKOMPISKA ng mga awtoridad ang mga ilegal na troso mula sa apat katao sa isinagawang anti-illegal logging operation sa bayan ng Doña Remedios Trinidad, sa lalawigan ng Bulacan, nitong Miyerkoles ng hapon, 13 Oktubre.
Kinilala ni P/Col. Manuel Lukban, Jr., acting provincial director ng Bulacan PPO, ang apat na suspek na sina Christian Lungalong, July Tamayo, Aldrin Jay Berin, at Rodel Dayson, pawang mga residente sa Brgy. Pias, bayan ng Gen. Tinio, lalawigan ng Nueva Ecija.
Nabatid na nagkasa ang magkasanib na mga elemento ng Doña Remedios Trinidad MPS at mga miyembro ng CENRO Bulacan ng anti-illegal logging operation sa Sitio Sumacbao, Brgy. Kalawakan, sa nabanggit na bayan kung saan naaktohan ang mga suspek, dakong 5:00 pm, kamakalawa.
Nakompiska mula sa mga naarestong suspek ang mga ilegal na pinutol na troso tulad ng red/white lauan at tangile lumbers na binubuo ng 7,038 bd. ft., tinatayang nagkakahalaga ng P351, 900.
Nasa kustodiya ng CENRO Baliuag ang mga narekober na ebidensiya para sa kaukulang disposisyon samantala nakatakdang sampahan ng kaso ang mga suspek na ihahain sa korte. (MICKA BAUTISTA)
