Karla pinaaatras, binatikos ang pagiging nominee ng isang partylist

HATAWAN
ni Ed de Leon

NAGPAHAYAG ang ABS-CBN, na hindi nila pina-uurong si Karla Estrada na ngayon ay tumatakbo sa ilalim ng partylist na Tinggog, dahil sa paniwala nila na gusto lamang  makapaglingkod ng ina ni Daniel Padilla sa bayan.

Maraming supporters ang bumatikos kay Karla at hinihiling na umatras siya dahil ang party list na Tinggog ay isa sa mga bumoto para maipasara ang ABS-CBN, na mayroon siyang TV show, at siyang nagpasikat sa kanyang anak na si Daniel.

Maging ang ilang dating empleado ng network na nawalan ng trabaho nang maipasara ang ABS-CBN ay nag-post din ng mga pambabatikos kay Karla.

Deadma naman si Karla sa sinasabi ng mga netizen, dahil siguro ang iniisip niya, tiyak namang susuportahan siya ng KathNiel at kung mangyayari iyon, tiyak na panalo ang kanilang party list at siya ay mauupong congresswoman sa susunod na kongreso.

Ano naman kaya ang unang batas na ipapanukala ni Karla?