BBM ‘tiyak’ hahabol sa deadline para maghain ng COC (Para sa national post)

SA KABILA ng kaliwa’t kanang endorsement ng ilang grupo para tumakbo si dating senador Ferdinand “Bongbong” Marcos, Jr., nananatiling tahimik at low-profile habang pinag-aaralan ang lahat ng posibilidad ng pakikipag-alyansa sa darating na halalan.

Ayon kay Atty. Vic Rodriguez, tagapagsalita ni Marcos, nagpapasalamat ang dating senador sa dagsa ng suporta mula sa mga kilalang partido politikal, mga pinuno ng barangay, at ilang concerned citizens.

Gayonman nanatiling tahimik sa kanyang pinal na desisyon ang dating senador.

Ayon kay Rodriguez, myembro ng Partido Federal ng Pilipinas (PFP) na naunang nag-endoso sa dating senador bilang kanilang standard-bearer sa 2022 elections, nakasisigurong magdedesisyon si Marcos sa lalong madaling panahon bago ang deadline ng filing of candidacy sa Commission on Elections (Comelec).

Dagdag ni Rodriguez, pinag-iisipang mabuti ni Marcos ang lahat dahil hindi madali ang magdesisyon lalo’t mainit na usapin ang pandemic government at post-pandemic situation ngayong darating na halalan.

Bukod sa PFP, inendoso na rin si Marcos ng Kilusang Bagong Lipunan (KBL), ang malaon nang political party ng mga Marcos.

Inihayag ng tagapagsalita ni Marcos na pinagtutuunan din nito ng pansin ang pakikipag-alyansa sa posibleng makakatambal sa halalan kabilang ang pakikipag-usap kay Davao Mayor Inday Sara Duterte.

Pansamantalang nakabinbin ang pakikipag-alyansa ni Marcos kay Davao city mayor Sarah dahil sa pahayag na hindi siya tatakbo sa darating na halalan.