HATAW! D'yaryo ng Bayan hatawtabloid.com
HATAWAN
ni Ed de Leon
NAKATUTUWA rin naman at sa kabila ng mga tsismis na medyo gipit daw sa pera ngayon si Mark Herras, pinakasalan na niya kahit na sa sibil lamang si Nicole Donesa. Sa ngayon marami ang nagpapakasal na lamang sa sibil dahil hindi mo naman malaman kung kailan bukas o sarado ang mga simbahan. Iyong iba, ang akala ay hindi maaaring ikasal sa simbahan kung nakasara iyon, pero ang totoo, sarado man ang simbahan, wala mang misa ay maaaring magkasal dahil iyan naman ay ibang sakramento
Ngayon kung dahil sa sitwasyon ay nagpakasal nga sila sa sibil ok na rin iyon dahil ang mahalaga ay gusto nilang panindigan ang kanilang pagiging mag-asawa.
Sabi nga nila, dapat naman pakasalan na ni MArk si Nicole lalo na’t naisilang na ang kanilang panganay na si Corky.
Pero kung sasabihin ngang pinakasalan ni Mark si Nicole dahil kay Corky, ano naman ang sitwasyon ngayon ng kanyang naunang anak na si Ada? Ano kaya ang sasabihin ngayon ni Diane Evangelista, ang nanay ni Ada?
Iyong nangyaring iyon sa buhay ni Mark, na nagkaroon nga siya ng anak na hindi niya inaasahan, ikinagulat din ng marami, dahil lumalabas na ipinagbuntis si Ada ng nanay niya noong panahong syota pa ni Mark si Inna Asistio. Sa simula’t simula rin, sinabi ni Mark na nag-usap naman sila ni Diane at nagkasundo kung paano nila magkatulong na palalakihin si Ada.
Siguro naman, ang asawa ni Mark ngayon na si Nicole ay nauunawaan iyon at hindi siya magiging hadlang kung gampanan man ni Mark ang tungkulin niya bilang ama ni Ada. After all, bago pa nagging sila, tao na si Ada. Sa ganyang sitwasyon, mas lalo ngang dapat na gampanan ni Mark ang tungkulin niya bilang tatay ni Ada. Hindi na nga
niya pinanagutan ang nanay niyon, pangatawanan naman niya ang pagiging tatay niya sa kanilang anak.
Wala na siyang relasyon sa nanay ng nauna niyang anak, pero nananatili ang kanyang responsibilidad sa bata, lalo’t inamin naman niya na siya nga ang tatay niyon.
Sana nga magampanan nang husto ni Mark ang responsibilidad niya ngayon bilang asawa ni Nicole gayundin ang pagiging tatay ni Corky at ni Ada rin.
