HATAW! D'yaryo ng Bayan hatawtabloid.com
ARESTADO ang isang lalaki matapos ireklamo ng isang dalagita na dinakma ang kanyang dibdib habang naglalakad sa lansangan sa bayan ng Talavera, lalawigan ng Nueva Ecija, nitong Miyerkoles, 25 Agosto.
Sa ulat mula kay P/Lt. Col. Heryl Bruno, hepe ng Talavera Municipal Police Station, kinilala ang nadakip na suspek na si alyas June, 27 anyos, binata, at residente sa Brgy. Esguerra, sa nabanggit na bayan.
Inaresto ang suspek sa follow-up operation na ikinasa ng mga tauhan ng Talavera MPS dahil sa reklamo ng isang dalagita na dinakma ang kanyang dibdib habang naglalakad sa Brgy. Poblacion Sur, dakong 6:40 pm kamakalawa.
Napag-alamang, matapos ang pambabastos sa biktima, tumakas si alyas June sakay ng isang motorsiklo ngunit natunton din ng mga awtoridad ang kanyang kinaroroonan.
Matapos pumutok ang balita na nahuli na ang suspek ay humugos sa himpilan ng Talavera MPS ang iba pang biktimang nagsasabing binastos din sila ni alyas June sa iba’t ibang lugar at panahon.
Sasampahan ng kasong Acts of Lasciviousness ang suspek na nakakulong sa Talavera MPS Jail. (MICKA BAUTISTA)
