HATAW! D'yaryo ng Bayan hatawtabloid.com
ARESTADO ang tatlo katao kabilang ang isang menor de edad matapos tangayin ang isang set ng scaffolding sa Malabon City, kamakalawa ng hapon.
Kinilala ang mga nadakip na sina Raul Hillario, 26 anyos, John Edward Zacarias, 18 anyos, kapwa residente sa Fishpond Maypajo, Sawata Area 1 D.D Caloocan City at ang menor de edad.
Sa report nina P/SSgt. Jeric Tindugan at P/Cpl. Renz Marlon Baniqued kay Malabon City chief of police (COP) Col. Albert Barot, dakong 1:00 pm nang tangayin ng mga suspek ang isang set ng scaffolding na nagkakahalaga ng P11,000 at pagmamay-ari ni Sherly Solana, 37 anyos, sa isang bakanteng lote sa bahay ng biktima sa #57 N. Vicencio St., Brgy. Niugan.
Matapos ito, pumara ang mga suspek ng tricycle at isinakay ang tinangay nilang items ngunit nang papatakas na sila ay napansin sila ng biktima na agad humingi ng tulong sa mga barangay tanod ng Niugan.
Sa follow-up operation ng mga barangay tanod sa tulong ng Malabon Police Sub-Station 4, naaresto ang mga suspek at nabawi ang tinangay nilang isang set ng scaffolding.
(ROMMEL SALES)
