HATAW! D'yaryo ng Bayan hatawtabloid.com
NINETEEN years na ang Wish Ko Lang at sa loob ng halos dalawang dekada, marami na rin itong pangarap na tinulungang matupad. At sa gitna ng pandemya, patuloy ang programa ni Vicky Morales sa pagbibigay ng pag-asa sa bawat Filipino.
Bilang treat sa loyal viewers, isang month-long anniversary special ang handog ng Wish na pagbibidahan ng mga naglalakihang artista.
Una na rito ang bagong Kapuso na si Pokwang na bibida sa episode ngayong July 3 kasama sina Jeric Gonzales, Arra San Agustin, Jennie Gabriel, at Bench Hipolito.
Sa kuwentong Ang Forever ni Miss Virgie, isang dedicated Filipino teacher na nagngangalang Virgie ang gagampanang karakter ni Pokwang. Dahil sa sobrang busy, hindi na nakapag-asawa si Virgie. Pero hindi niya inakalang sa 25th anniversary ng kanilang paaralan, makikita niya ang isa sa mga dati niyang estudyante na si Joshua (Jeric) na mahuhulog ang loob niya at magiging manliligaw niya. Hahadlangan naman ng ex-girlfriend ni Joshua na si Pauline (Arra San Agustin), na dati ring estudyante ni Virgie, ang namumuong pagtitinginan ng dalawa.
Bukod kay Pokwang, dapat ding abangan ang iba pang bigating guest stars sa 19th anniversary ng bagong Wish Ko Lang, tulad nina Christopher de Leon, Albert Martinez, Rhian Ramos, at Sanya Lopez.
Mapapanood ang Wish Ko Lang tuwing Sabado, 4:00 p.m. sa GMA Network.
Joe Barrameda
