HATAW! D'yaryo ng Bayan hatawtabloid.com
NADAKIP ng mga awtoridad ang walong hinihinalang mga tulak ng droga at tatlo pang may iba’t ibang paglabag sa batas sa ikinasang serye ng police operation sa lalawigan ng Bulacan mula Sabado hanggang Linggo ng umaga, 20 Hunyo.
Sa ulat na ipinadala kay P/Col. Lawrence Cajipe, provincial director ng Bulacan PNP, naaresto ang walong drug suspects sa serye ng buy bust operations na ikinasa ng mga operatiba ng Station Drug Enforcement Units (SDEU) ng San Ildefonso, Guiguinto, Norzagaray, at Marilao Municipal Police Stations.
Kinilala ang mga nadakip na suspek na sina Rodolfo Cruz, alyas Amang, ng Brgy. Gabihan, San Ildefonso; Niño Lazaro at Ver Gabriel, kapwa residente sa Brgy. San Agustin, Hagonoy; Jeremias Benjamin, Sr., Richmond Salvador, at Erika Medalle, pawang mga naninirahan sa Brgy. Matictic, Norzagaray; Devina Vecina at isang menor de edad (Child in Conflict with the Law), kapwa residente sa Brgy. Lambakin, Marilao.
Nakompiska mula sa mga sa suspek ang 18 selyadong plastic sachet ng hinihinalang shabu, at buy bust money.
Samantala, sa inilatag na anti-illegal gambling operations, nasakote ng mga tauhan ng Marilao Municipal Police Station (MPS) ang mga suspek na kinilalang sina Whilmer Dizon, at Norberto Cahusay Villafranca, Jr., kapwa residente sa Brgy. Lambakin, Marilao, Bulacan.
Naaktohan ng mga tauhan ng Marilao MPS ang mga suspek sa sugal na ‘cara y cruz’ sa Northville 4, sa nabanggit na barangay.
Arestado rin ng mga tauhan ng Paombong Municipal Police Station (MPS) si Juan Crisanto dela Cruz ng Calison, Brgy. Sto. Rosario, Paombong sa kasong Frustrated Murder.
Nabatid, ang suspek na kinilalang si Juan Crisanto dela Cruz at biktimang si Benjamin Adriano, Jr., ay nagkaroon ng pagtatalong humantong sa pananaga at pananaksak ng suspek sa biktima.
Agad nadakip si Dela Cruz sa pagresponde ng mga tauhan ng Paombong MPS na ngayon ay nakapiit sa himpilan.
(MICKA BAUTISTA)
