Pinalawak na tulay ng Angat River sa Bulacan, tapos na

KOMPLETO at tinapos na ng Department of Public Works and Highways (DPWH) ang pagpapalawak sa 2.22 kilometrong bahagi ng Plaridel Bypass Road sa lalawigan ng Bulacan, mula sa dalawa ay mayroon nang apat na lane sa nasabing tulay.

Ayon kay DPWH Secretary Mark Villar, kabilang sa natapos ang karagdagang dalawang lane bridge parallel sa 1.12 kilometrong Angat Bridge, isa sa pinaka­mahabang tulay sa Filipinas.

Isa ang Plaridel Bypass Road Project sa mga itinuturing na “game-changing infrastructure flagship projects” ng gobyerno para mabawasan ang oras ng biyahe.

Nagsagawa ng final inspection si Villar, kasama si Undersecretary for UPMO Operations Emil Sadain at UPMO RMC 1 Project Managers Benjamin Bautista at Basilio Elumba, sa 2.22 kilometer widened section na sakop ng contract package (CP) 3 ng Arterial Road Bypass Project (ARBP) Phase 3, araw ng Miyerkoles, 21 Abril.

Kasama sa ARBP-Phase 3 ang pagpa­palawak mula sa dalawang lane para maging apat na lane ang buong 24.61-kilo­metrong bypass road mula NLEX sa Balagtas hanggang San Rafael, Bulacan.

Sa pamamagitan nito, inaasahang maiib­san ang bigat ng trapiko sa Pan-Philippine Highway (PPH).

(MICKA BAUTISTA)