HATAW! D'yaryo ng Bayan hatawtabloid.com
MAY naglabas ng kuwento sa internet na umano may listahan ang Cultural Center of the Philippines (CPP) at National Commission for Culture and the Arts (NCCA) ng mga nominated nilang National Artists. May mga, sorry to say “mapagpaniwala” na nabiktima ng fake news na iyon. Paano mong paniniwalaan ang tinghoy na iyon samantalang ang mismong websites ng CCP at NCCA ay walang inilabas na announcement.
Wala ring lehitimong media na pumatol sa kalokohang posts. Kung totoo iyan, bakit siya lang ang nakaaalam at wala isa mang lehitimong diyaryo ang pumatol diyan on line? Halimbawa nga itong Hataw, kung may dumating na istorya na hindi umabot sa deadline ng diyaryo, may ginagawang update ang Hataw on line 24 oras kaya hindi mo iyan mauunahan sa pagbabalita. Ganoon din naman ang ginagawa ng mga lehitimong diyaryo. Iyong mga media at diyaryong hotoy-hotoy lang, hindi namin alam. Pero may mga “mapagpaniwala” kaya nabibiktima nila.
May mga tao kasing basta ang sinabi ay gusto nila, paniniwalaan agad nila at ikakalat pa. Mabuti kung sila na lang ang maging biktima ng pagiging “mapagpaniwala” nila, eh kaso baka isipin pang kasama ang mga artistang nabanggit sa fake news na iyon. Nakahihiya.
Halimbawa na nga si Ate Vi (Vilma Santos), hindi naman sa hindi siya interesado. Alam naman niyang iyan ang highest award para sa isang artist, pero hindi hinahabol iyan ni Ate Vi dahil sinasabi nga niyang hindi pa naman siya nagre-retire bilang isang artista. Marami pa siyang gagawin kaya mahaba pa ang kanyang panahon para riyan.
Kung bibigyan siya ng ganyang award ng maaga sige, kung hindi naman huwag na muna. Mas mabuti na nga naman iyong huwag muna siyang ma-nominate kaysa ma-by pass naman siya.
Si Ate Vi iyan naman ang hindi naghahabol ng awards talaga. Maski nga iyong mga acting award eh, kung manalo siya manalo, kung hindi ok lang. Kung sasabihin nga niya, basta gumagawa siya ng pelikula ang iniisip niya iyong fans, iyong publiko. Masisiyahan ba ang mga tao sa pelikula o TV show niya? Kasi ginagawa naman niya iyon para sa mga tao. Kung bigyan man siya ng award dahil sa mga iyon bonus na lang iyon. Eh kung mapupuntahan ninyo ang bahay ni Ate Vi, may isang kuwarto siyang punompuno na ng trophies na napanalunan niya, sobrang bonus na iyon para sa kanya. Ano pa nga ba ang hahabulin niya?
HATAWAN
ni Ed de Leon
