HATAW! D'yaryo ng Bayan hatawtabloid.com
MAGHAHAIN ngayong araw ng P50 bilyong supplemental fund para sa mga retiradong sundalo si ACT-CIS representative at House Appropriations Committee chairman Cong. Eric Yap.
“Ito po ang ipapalit natin sa nawawalang retirement fund ng mga sundalo na pinagtatanggal noon pang 2018 na ngayon lang nabunyag,” ayon kay Cong. Yap.
Sa panayam kamakailan ng media, sinabi ni Yap, bagamat 2019 siya naupo bilang chairman ng House Appropriations Committee, ang budget para sa 2020 ang kanyang narebisa at inaprobahan.
“‘Yung na-review ko na budget ay ‘yung para sa 2020 dahil ‘yung 2019 budget ay tinalakay noong 2018 ay inihanda the year before and so forth,” ayon kay Yap.
Base sa House Appropriations Report, si dating congressman at Appropriations chair Karlo Nograles ang naghanda ng budget para sa 2018.
Sa record, makikitang binawasan ng P23.5 bilyon ang pensiyon ng mga sundalo.
At noong 2019 budget, si Rep. Rolando Andaya ang nag-ayos ng pondo bilang House Appropriations chairman.
May P39 bilyon ang tinapyas sa pensiyon ng mga sundalo noong panahong iyon.
Ngunit ang pinakamalaking tinapyas na pondo sa retired AFP personnel ay noong 2019 na umabot sa P74 bilyon batay sa House Appropriations record.
Si Davao 3rd District Rep. Isidro Ungab ang nag-aproba ng naturang budget cut bilang House Appropriation Chairman.
“‘Yung P20 bilyon na inalis natin sa pension ng mga sundalo noong nakaraang taon ay inilagay po natin sa pagpapatayo ng DPWH ng quarantine facilities, ayuda sa mga nawalan ng trabaho at ‘yung iba ay napunta sa DSWD assistance to individuals in crisis situation,” dagdag ni Yap.
“Willing po ako maimbestigahan at ilabas ang records para magkaalaman kung saan napunta ‘yung pondo,” ani Yap.
“Pero ang hindi ko po masagot ay ‘yung mga pinagtatapyas ng Appropriations chairman before me, kung saan nila dinala ang pondo,” pahabol ng mambabatas.
