HATAW! D'yaryo ng Bayan hatawtabloid.com
INIANUNSIYO ng isang dating star player ng PBA at ngayon ay alkalde ng bayan ng Bulakan na siya ay positibo sa CoVid-19.
Sa pahayag na nakapaskil sa kanyang Facebook page, napag-alamang asymptomatic carrier si Bulakan Mayor Vergel Meneses matapos ang RT-PCR test.
Ayon sa alkalde, siya ay kusang-loob na nagpasuri ng RT-PCR noong nakaraang Miyerkoles, 9 Disyembre, at bilang pagsunod sa health protocols ay bumukod at nag-isolate siya habang hinihintay ang resulta hanggang kinabukasan (Huwebes), 10 Disyembre lumabas ang resultang siya ay positive-asymptomatic.
Sumasailalim ngayon ang 1995 PBA Most Valuable Player at 2-time PBA slam dunk champion sa quarantine habang mino-monitor ang sitwasyon ng CoVid-19 sa kanyang nasasakupan.
Pahayag ng alkalde sa kanyang Facebook post, “Batid po ninyo na ako ay kaisa ninyo, araw at gabi na nagbabantay at lumalaban sa paglaganap ng CoVid-19. Kung kaya ninais ng inyong lingkod na mag-self-quarantine sa isang ligtas na lugar na maayos na mapamumunuan ang mga gampanin sa ating pamahalaang bayan.”
Tiniyak ng dating coach ng Jose Rizal University Heavy Bombers sa kanyang constituents na siya ay nasa maayos nang kalagayan sa kabila na siya ay nag-positibo sa CoVid-19.
(MICKA BAUTISTA)
