John Lloyd, nagpapagawa ng bahay sa El Nido

Sa Palawan naman nakikita ngayon si John Lloyd Cruz. Huwag kayong magdududa ng kung ano, kaya siya naroroon ay dahil sa kanyang ipinaga­gawang bahay sa El Nido. Kung iisipin, ano nga ba ang dahilan at nagpapagawa pa siya ng bahay sa El Nido eh may bahay na siya sa Antipolo. May ipinatayo na rin siyang bahay sa Cebu. Bakit kailangan pa ang ikatlong bahay?

Iyang El Nido ay isang sikat na tourist destination. Siguro sa panahong ito, dahil sa pandemic ay wala pa halos turista, at mahina ang kita sa El Nido. Natural mababa rin ang presyo ng real estate, at ito ang panahon para bumili. Ganoon siguro ang naisip ni John Lloyd. Iyong bahay niya ay maaari niyang paupahan, at depende sa location at lawak ng lupa, maaari niya iyong gawing resort pagdating ng panahon.

Ang napansin namin kay John Lloyd, talagang ginagamit niya ang kanyang oras para mapalawak ang kanyang mga investment, simula noong nagbakasyon siya sa showbiz three years ago. Tama naman iyon. Pinaghahandaan na niya ang kanyang kinabukasan, at ang kinabukasan din ng kanyang anak.

Siguro matapos na ihanda ni John Lloyd ang lahat ng iyan at saka siya babalik nang husto ulit sa showbusiness. After all maski na magtagal pa naman ang kanyang bakasyon, ok lang dahil talagang hinihintay siya ng  fans. Bukod doon, dahil mas marami siyang nakakasalamuha ngayong mga karaniwang tao, na mukhang lahat naman ay nasisiyahan na makilala siya, mas lumalawak pa ang kanyang fan base.

After all wala naman talagang dahilan para magmadali siyang bumalik sa showbiz ngayon. Sarado naman ang kanilang network na roon siya may trabaho. Sarado pa rin ang mga sinehan sa Metro Manila, ibig sabihin kalokohan pang magpalabas ng mga bagong pelikula. Gagawa ka ba ng malaking pelikula kung wala ka namang malaking sineng lalabasan? Ano iyon, gagawa ka ng high budget movie para ipalabas lang sa internet?

Babalik iyang si John Lloyd kung makikita niyang ok na ulit ang industriya.

HATAWAN
ni Ed de Leon