HATAW! D'yaryo ng Bayan hatawtabloid.com
LUCKY charm nina Prima Donnas stars Aiko Melendez at Wendell Ramos ang isa’t isa. Bata pa lang ay magkaibigan na ang dalawa dahil sa kanilang manager noon, ang namayapang si Douglas Quijano.
Tanong tuloy ng netizens, sa tagal na nilang magkakilala, bakit nga ba hindi sila na-link sa isa’t isa?
Paliwanag ni Aiko, “Kasi matagal na kaming magkaibigan ni Wendell, mga bata pa lang tayo, ‘di ba?”
Sey pa ni Wendell, “Yes, at saka noong una ko pa lang pagpasok sa industriya natin, sa showbiz, ang una ko pong kaibigan na artistang babae talaga, at kumausap sa akin kahit pagkatapos noong kumuha siya ng award, naalala mo ‘yun? Aiko Melendez ka na noon, eh.”
“Grabe naman ‘to, magkasing-edad lang tayo halos,” natatawang sagot naman ng aktres.
Suwerte rin sila dahil sa nagtatagal ang mga teleserye na kanilang pinagsasamahan kagaya ng Prima Donnas. “Laging ‘pag nagsasama kami ni Wendell, sobrang tumatagal ‘yung mga show.”
Noong Oktubre 18 ay natapos na ang 21-day lock-in taping ng cast and crew ng Prima Donnas. Kaya naman inaabangan na ng fans ang nalalapit na pagpapalabas ng fresh episodes ng serye.
Samantala, patuloy namang napapanood ang recap ng Prima Donnas sa GMA Afternoon Prime.
Joe Barrameda
