HATAW! D'yaryo ng Bayan hatawtabloid.com
MASASAKSIHAN na ng mamamayan ang isang proyekto ng lokal na pamahalaan ng Maynila na nagkakahalaga ng P30 milyon — ang makulay na dancing fountain sa Anda Circle, Port Area, Maynila.
Ibinida ni Manila Mayor Francisco “Isko Moreno” Domagoso, na ang naturang proyekto ang bagong lugar sa Maynila kung saan puwedeng mag-selfie.
Tinawag na Rotonda Anda, ang naturang proyekto na nagsisilbing ikutan ng mga sasakyan mula Bonifacio Drive patungong Port Area, Navotas, Malabon, at Roxas Boulevard.
Personal na binisita ni Moreno nitong weekend ang lugar, ininspeksiyon at sinubok ang multi-milyong pisong color dancing fountain.
Inasistihan si Moreno nina city engineer Armand Andres, city electrician Randy Sadac at Department of Public Service chief Kenneth Amurao.
Pinasalamatan ni Mayor Isko si Amurao sa paglilinis ng lugar na tila naging tambakan ng basura at dumi ng tao mula sa mga palaboy.
Pinuri rin ni Moreno si Andres dahil sa total transformation ng lugar na hindi halos makikilala sa sobrang laki ng iginanda matapos ang rehabilitasyon.
Ibinida ni Andres, bukod sa major landscaping ay naglagay sila ng ilaw para sa mga motorista at pininturahan at ini-restore ang orihinal na kulay ng monument.
Nabatid na ang Rotonda Anda ay itinayo bilang pagkilala at parangal kay Simón de Anda y Salazar sa kanyang inisyatiba na tutulan ang pananakop ng Britanya sa Maynila na nagsimula noong 1762.
Si Anda ay Gobernador Heneral ng Filipinas mula 1770 hanggang 30 Oktubre 1776.
Nalaman na ang orihinal na monumento nito ay itinayo malapit sa Pasig River noong 1871 sa utos ni Gobernador Heneral Carlos Maria de la Torre pero ito ay nasira nang husto noong World War II nang okupahin ng mga Hapon ang Maynila, kaya nilipat sa kasalukuyang lugar sa Bonifacio Drive at ginawang monumento matapos ang digmaan.
Ang Rotonda Anda ay boundary ng Intramuros at Port Area at palitan sa kanto ng Bonifacio Drive, Mel Lopez Boulevard, Andres Soriano Avenue (dating Aduana) at Roberto Oca St. (BRIAN BILASANO)
