Janella, tahimik sa tunay na dahilan ng pagpunta sa UK

HANGGANG ngayon, nananatiling tahimik si Jannella Salvador tungkol sa mga tsismis na kaya siya nasa UK, kasama ang kanyang boyfriend na si Markus Paterson ay umano roon siya magsisilang ng kanilang anak. Lumabas ang tsismis na iyan dahil din sa isang video na naka-upload sa social media account ni Markus na sinasabi ni Janella na  “I can’t jump”. At pinakakahulugan ng iba na kaya hindi siya makatalon ay dahil buntis siya.

Hanggang ngayon ay hindi sinasagot ni Janella ang tuwirang tanong kung siya ay buntis sa kanyang social media account. Nananatili siyang tahimik. Hindi rin pinansin ng kanyang inang si Jenine Desiderio ang mga ganoong tanong sa kanya, at kung bakit siya pati ang anak na si Russel ay kasama nga ni Janella sa UK.

Ano nga ba ang plano at mukhang bigla ang pagpunta nila sa UK?

May mga informed source na nagsabing talaga namang matagal na ang planong bakasyong iyon ni Janella at kaya lamang mukhang naging biglaan ay dahil sinamantala nga nila iyong nagkaroon ng flight ng eroplano sa parehong destinasyon na gusto nilang puntahan. Alam naman nating ilang buwan ding kanselado ang mga international flight dahil sa lockdown.

Kung hindi man sila makabalik agad, iyon ay dahil pa rin sa limitadong flights dahil sa Covid-19. Kaya posibleng matagalan nga sila sa UK. Maaari lamang masagot ang tanong na iyan kung nakabalik na sila sa Pilipinas. Pero kailan naman iyon?

Basta ang maliwanag lamang sa ngayon, nasa UK nga si Janella, kasama ang kanyang ina at kapatid at nagkita na sila roon ni Markus.

HATAWAN
ni Ed de Leon