HATAW! D'yaryo ng Bayan hatawtabloid.com
SA panahong ito ng pandemya, dumarami ang mga Filipino na ginagamit ang mga abilidad at talento nila para makaahon sa hirap ng buhay. Pero tulad ng maraming nagdaang bagyo, lindol, at kahit pa pagsabog ng bulkan, laging nakahahanap ng paraan ang mga Pinoy para makabangon–at kadalasan pa’y nakangiti tayo habang ginagawa ito!
Ang katatagan at tibay ng loob ay hindi lamang katangian ng mga Filipino, ito ay isang talento.
At ngayon, may bagong program sa digital at TV para ipakita ang galing nating ito, ang Bangong Talentadong Pinoy na si Ryan Agoncillo ang magho-host.
Taong 2008 hanggang 2014, napanood ang Talentadong Pinoy na talagang naging #1 sa TV ratings.
Ngayon ilalabas muli ng Bangon Talentadong Pinoy ang napakarami at nakatutuwang mga talento ng mga Filipino. At ngayon, aabot ng P2.8-M ang total cash prizes na ipamimigay! Mas marami na ang pwedeng manalo ngayon–mula P2,000 hanggang P5,000 hanggang P50,000 hanggang P250,000!
Ang Bangon Talentadong Pinoy ay mapapanood ‘di lang online kundi televised din sa bagong free-to-air channel ng Cignal, ang OneTV!
“More than ever, kailangan ng mga tao ng show na tulad nito,” paliwanag ni Ryan. “Noong una hindi ko inisip na balikan itong ‘Talentadong Pinoy’ kasi nagawa ko na ito. Pero na-kumbinse ako agad noong narinig ko na bago ang konsepto ng show at dahil sa layunin nitong magbigay pag-asa at premyo na rin sa mga tao dahil alam nating napakaraming may kailangan nito ngayon.”
Para sumali, kailangang i-like ng contestants ang BANGON TALENTADONG PINOY page sa Facebook. Pagkatapos, mag-send sila sa private message ng kanilang videos ng performance nila–pwedeng solo, duo o kahit grupo. Kung masyadong malaki ang video, pwede ring magpadala ng link sa video nila na nasa YouTube, Facebook, IG, Tiktok, etc. Kapag nakapasa sila sa shortlist ng Selection Committee, kokontakin sila ng team para ipaliwanag ang mga susunod na dapat gawin.
Ang Bangon Talentadong Pinoy ay ipo-prodyus ng The IdeaFirst Company para sa Cignal TV. Ang orihinal na team ng Talentadong Pinoy ay babalik kasama ni Ryan: mula sa director na si Rich Ilustre, writer na si Paolo Bustamante, at producers na sina Perci Intalan, Malou Escio Gascon, at Dacky Dacanay. Ngunit ngayon tatayong Creative Director ng programa ang acclaimed filmmaker na si Jun Robles Lana.
Kasalukuyang nag-a-audition na ng contestants ang team ng Bangon Talentadong Pinoy at magsisimula nang mag-taping ngayong Hulyo.
