Ang Huling El Bimbo, The Musical, mapapanood ng libre (Pantawid ng Pag-ibig campaign ng ABS-CBN)

MAGBABALIK ang Huling El Bimbo, ang sikat at pinag-usapang rock concert musical para mapanood ng mas marami dahil palabas ito ng libre sa ABS-CBN Facebook at YouTube mula Biyernes (Mayo 8) hanggang Sabado (Mayo 9).

Katuwang ng ABS-CBN ang Resorts World Manila at Full House Theater Manila sa paghahatid ng palabas para makalikom ng donasyon para sa Pantawid ng Pag-ibig na kampanya ng ABS-CBN na tumutulong sa mga Filipinong higit na naapektuhan ng enhanced community quarantine.

Unang napanood sa entablado noong 2018, umabot sa higit 100 na pagtatanghal ang naihandog ng Ang Huling El Bimbo, The Musical sa Resorts World Manila. Tungkol ito sa apat na magkakaibigang sama-samang hinaharap ang pagsubok ng buhay na sumasalamin sa napapanahong suliranin ng mga Filipino.

Ilan sa mga awiting mapakikinggang muli ay ang  Minsan (Once), With a Smile, Ligaya (Joy), at Ang Huling El Bimbo.