HATAW! D'yaryo ng Bayan hatawtabloid.com
ISANG espesyal na concert ang handog ni Sharon Cuneta para sa mga ina ngayong Mother’s Day. Ang fundraising concert ay pinamagatang Sharon: Love and Music, A Mother’s Day Special, na mapapanood sa ABS-CBN Facebook, YouTube, at website (ent.abs-cbn.com) sa Mayo 10, 8:00 p.m.
Kasama si maestro Louie Ocampo, maghahatid si Sharon ng gabing puno ng musika sa pag-awit niya ng ilan sa mga pinakasikat na awiting tiyak magdadala ng saya, pag-ibig, at inspirasyon sa bawat tahanan.
Bukod naman sa selebrasyon ng Mother’s day, ang concert ay naglalayon ding makalikom ng donasyon para sa Pantawig ng Pag-ibig campaign ng ABS-CBN, na gagamitin bilang pambili ng pangunahing pangangailangan ng mga mamamayang lubos na apektado ng enhanced community quarantine.
Hindi ito ang unang pagkakataon na nagbigay ng tulong ang megastar ngayong panahon ng krisis. Kamakailan ay naghandog siya ng P1-M donasyon para sa Bantay Bata 163 sa katatapos na fundraising concert ni Regine Velasquez, at nag-abot din ng P3-M para naman sa kampanya ng aktres na si Angel Locsin para sa mga pangangailangan ng frontliners.
Binuksan ni Sharon ang taon at nagdiwang ng kanyang kaarawan bilang isang Kapamilya matapos niyang mag-renew ng kontrata sa ABS-CBN noong Enero. Ibinahagi niya rin ang kanyang nakatakdang pagbabalik telebisyon sa bagong season ng Your Face Sounds Familiar Kids.
