HATAW! D'yaryo ng Bayan hatawtabloid.com
WALANG basbas ni Pangulong Rodrigo Duterte ang plano ni Solicitor General Jose Calida na bawiin ang prankisa ng ABS-CBN, ayon kay Presidential Spokesperson Salvador Panelo.
Ang pahayag ay ginawa ni Panelo kasunod ng plano ni Calida na maghain ng quo warranto petition sa Korte Suprema na kumukuwestiyon sa ‘validity’ ng prankisa ng naturang TV network.
Ayon kay Panelo, ang plano ay sariling aksiyon ni Calida, kilalang supporter ng pamilya Marcos, dahil tungkulin niya ito bilang pinuno ng nasabing tanggapan.
Anang Presidential Spokeman, nabasa na niya ang report ngunit kailangan pa niyang kompirmahin sa Solicitor General kung ang planong paghahain ng petisyon para bawiin ang prankisa ng TV network ay binabalangkas pa o nagawa na.
Idinagdag ni Panelo na ang aksiyon ng OSG ay walang kinalaman sa naunang pahayag ni Duterte na dapat nang ibenta ang ABS-CBN dahil walang plano ang Chief Executive na i-renew ang prankisa nito.
“You must remember that the job of the SolGen is to file the appropriate petitions when he sees or feels that there’s a transgression of franchises or any law for that matter,” ani Panelo.
Samantala, sinabi ni Justice Secretary Menardo Guevarra, hindi natatalakay sa Cabinet meeting ang quo warranto petition laban sa ABS-CBN.
Ayon kay Guevarra, ang legislative franchise ng TV network ay pahapyaw lang na tinalakay, ilang buwan na ang nakalilipas.
“The renewal or non-renewal of the ABS-CBN franchise was casually mentioned in a Cabinet meeting several months ago, but the filing of a quo warranto has never been discussed at all,” ani Guevarra.
Magugunitang mainit ang Pangulo sa ABS-CBN dahil hindi ipinalabas ang kanyang political ads noong panahon ng kampanya kahit na nakapagbayad na siya, at sa halip ay mas pinaboran ang political ads ng kanyang kritiko na si dating Senador Antonio Trillanes IV.
HATAW News Team
PANELO SINOPLA
SI LACSON
“TALK to your lawyers, hindi ka naman abogado.”
Ito ang buwelta ng Palasyo sa pahayag ni Sen. Panfilo Lacson na mauuwi sa constitutional crisis ang nakaambang paghahain ng quo warranto petition ng Office of the Solicitor General sa Korte Suprema para sa prankisa ng ABS-CBN.
Ayon kay Presidential Spokesman Salvador Panelo, mas makabubuting kumonsulta muna si Lacson sa kanyang mga abogado lalo’t hindi naman siya nakapagtapos ng abogasiya.
Trabaho aniya ng Solicitor General na maghain ng kaso laban sa sino man na lumalabag sa batas.
Ibang usapin aniya ang pagre-renew ng prankisa dahil malinaw na ang kongreso ang may pasya nito at iba rin kung may nilabag sa prankisa ang ABS-CBN.
Magkahiwalay aniya na usapin ang dalawa at hindi dapat malito si Lacson.
Nakatakdang magtapos ang prankisa ng ABS-CBN sa darating na Marso at hanggang ngayon ay hindi pa umuusad sa kongreso ang renewal nito.
(ROSE NOVENARIO)
