HATAW! D'yaryo ng Bayan hatawtabloid.com
DINAGSA ang celebrity screening ng Barbara Reimagined na idinirehe ni Benedict Mique na hango sa horror film ni Celso Ad Castillo na Patayin Mo sa Sindak si Barbara na binigyan ng bagong twist.
Kasalukuyang napapanood na ito sa iWant na ang mga bida ay sina Nathalie bilang Barbara, JC de Vera, Mariel de Leon, at Xia Vigor.
Isinabay ang pagpapalabas ng Barbara Reimagined sa pagdiriwang ng ika-45 anibersaryo ng orihinal na iconic horror film ni Celso na pinagbidahan noon ni Ms Susan Roces.
Simula noon, nakilala ang pelikula bilang isa sa mga natatanging horror film ng Pinoy cinema at nagbunga ng iba pang remakes para sa iba’t ibang henerasyon ng viewers. Gumanap na bilang Barbara si Lorna Tolentino sa Patayin sa Sindak si Barbara noong 1995 at si Kris Aquino naman sa isang
ABS-CBN teleserye noong 2008.
Gaya ng ibang mga remake, tampok dito ang komplikadong kuwento ng dalawang magkapatid sa isang pelikulang puno ng paninindak.
Ngunit madaragdagan ng kakaibang takot ang bagong iWant movie dahil maghahandog ito ng isang nakagigimbal na twist sa istorya na hindi aasahan ng mga manonood.
Prodyus ng LoneWolf Films at ni Malaya Roxanne Santos.
(Reggee Bonoan)
