Dennis, may pasabog kina Julia at Gerald

PASABOG kaagad ang tanong kay Dennis Padilla sa pagsisimula ng #SSSMediacon na ginanap kahapon ng tanghali sa Music Hall, Metrowalk Pasig City tungkol sa anak niyang si Julia Barretto na umano’y dahilan ng hiwalayang Gerald Anderson at Bea Alonso.  Ano ang payo ng aktor sa anak?

Idinaan muna sa biro ng dalawang kasama ni Dennis sa pelikulang Sanggano, Sanggago’t Sangwapo na sina Janno Gibbs at Andrew E na ang tinukoy nila ay sina Jerald Napoles at Julian Trono na dinugtungan naman ng una na, “hindi matanggap na nagkatuluyan pala.”

Ang seryosong sagot ng ama ni Julia, “siyempre ‘pag anak mo, ang una mong gagawin, proteksiyonan, so ang sabi ko sa kanya (Julia), ‘wag ka na munang mag-social media. Pahinga ka na muna sa social media. Mas maganda magbakasyon ka na muna.

“Sabi ko nga sa kanya (Julia), kung wala ka pa namang shooting or hindi naman siya gaanong busy lumayo ka na muna sa social media.  Hintayin mo na lang mag-die down kung anuman ‘yung isyu.  So, ‘yun lang ‘yung huling nasabi ko kay Julia.”

Inamin ni Dennis na tinext niya si Gerald noong pumutok ang isyu, “nagtext ako tapos tumawag siya at nagka-usap kami at ni-remind ko lang sa kanya na, ‘pare, anak ko ‘yan!’  So, ‘yun lang, siguro naman alam na niya ‘yun kasi lalaki sa lalaki naman.”

At dito nga inamin ni Gerald sa ama ni Julia na nanliligaw siya sa aktres kaya mas lalo silang na-bash ng netizens at dito na rin nagsabi si Bea na wala siyang alam na break na sila ng aktor, basta ang alam niya ay hindi na lang sila nag-usap.

FACT SHEET
ni Reggee Bonoan