18-anyos estudyante patay sa pananaksak ng kasintahan

SINAKSAK hanggang napatay ang 18-anyos babaeng estudyante ng sinabing kasintahan sa Muntinlupa City, kamakalawa ng gabi.

Namatay noon din ang biktima na kinilalang si Grace Ruth Seguerra, dalaga, ng Purok 2, Barangay Cupang, Muntinlupa City, sanhi ng saksak sa iba’t ibang bahagi ng katawan.

Agad naaresto ng awtoridad ang suspek na sinasabing nobyo ng biktima na si Ashlanie Birol, 18, binata, estu­dyante, ng Purok 1, Barangay Alabang sa nasabing lungsod.

Sa pagsisiyasat nina P/CMSgt. Manuel M. Amodia Jr., at PSSG Trefilo Tingal, ng Criminal Investigation ng Mun­tinlupa City Police, natagpuan ng tinderang si Mary Grace Belediano, 42, ang duguang bangkay ng dalaga sa maramong lugar sa Purok 6, Baywalk, Bgy. Bayanan sa naturang siyudad, dakong 8:30 pm.

Batay sa inisyal na imbestigasyon, nagtitinda ng softdrinks at biskuwit si Belediano sa lugar nang  makarinig ng nagsi­sigawan at nag-aaway mula sa hagdan ng Bay­walk.

Makalipas ang ilang minuto, nakita ni Bele­diano ang suspek na nagmamadaling umalis sa lugar, na may sugat sa mukha at maraming dugo sa katawan.

Dahil dito, tiningnan ni Belediano ang lugar at  nakita niya ang bikti­mang dalaga na puno ng  dugo sa damuhan.

Kaagad humingi ng tulong ang tindera sa mga tauhan ng Police Com­munity Precinct (PCP-2) kaya mabilis na naaresto ang suspek na hindi pa nakakalayo sa nasabing lugar. Sa report ng puli­sya, isang crime of pas­sion ang naturang  kaso.