Boss, araw-araw nagpapa-kiss sa mga empleyada

ISANG boss ng isang kompanya sa Beijing, China ang inulan ng batikos matapos mapabalitang pinupuwersa niya ang kanyang mga babaeng empleyado na humalik sa kanya tuwing umaga.

Bilang patakaran ay pinapipila ng hindi na kinilalang lalaki ang kan­yang mga empleyadang babae tuwing 9:00 hang­gang 9:30 am upang isa-isa silang makipag-lips to lips sa kanya.

Ayon sa boss, ginagawa niya ito upang mapabuti ang relas­yon sa pagitan ng mga namamahala ng kom­pan­ya at ng mga emple­ya­do.

Sa una ay tutol ang mga kababaihan sa gustong mangyari ng kanilang boss ngunit tinanggap na rin nila ito sa takot na mawalan sila ng trabaho ayon sa ulat ng China press.

Higit sa kalahati ng mga empleado ng kompanya ay pawang mga kababaihan ngunit dadalawa lang sa kanila ang tumutol sa bagong patakaran at tulu­yang nag-resign.

Nagdahilan naman ang boss na ginaya lamang daw niya ang kanyang pata­karan sa mga kaugaliang nadatnan niya sa Amerika nang siya’y minsang bumi­sita roon.

Idinagdag niyang naging maayos daw ang relasyon niya sa kanyang mga empleado simula noong hinahalikan na niya araw-araw.

Hindi naman bumenta ang paliwanag ng boss sa milyon-milyong netizens sa China na kinondena ang lalaki dahil sa ginagawa niya sa kanyang mga empleado.

Sinisi rin nila ang mga babaeng empleyado na sa tingin nila ay pumapayag sa kabastusan ng kanilang boss dahil sa kanilang patuloy na pananatili sa kompanya.