HATAW! D'yaryo ng Bayan hatawtabloid.com
MIND your own business.
Ito ang buwelta ng Malacañang sa limang Amerikanong senador na nanawagan na palayain si Sen. Leila de Lima at ibasura ang kaso laban kay Rappler chief executive officer Maria Ressa pati na ang pagsusulong na imbestigahan ng international community ang extrajudicial killings sa bansa.
Ayon kay Presidential Spokesman Salvador Panelo, may sapat na suliranin ang Amerika na dapat pagtuunan ng pansin ng mga senador kaysa makialam sa mga usapin sa Filipinas.
“The five US senators who called for the release of Senator Leila de Lima and the dropping of charges against Rappler and Ms. Maria Ressa should mind their own business — their country has enough problems and they should focus on them,” ani Panelo.
Sinabi ni Panelo, tahasang panghihimasok na sa pamamalakad ng katarungan ng bansa ang ipinasang resolusyon nina US senators Edward Markey, Marco Rubio, Richard Durbin, Marsha Blackburn at Chris Coons.
“Their resolution is an unwelcome intrusion to the country’s domestic legal processes and an outrageous interference with our nation’s sovereignty as the subject cases are now being heard by our local courts. No government official of any foreign country has the authority or right to dictate on how we address the commission of crimes,” ani Panelo.
Iginiit ni Panelo na nakakalimutan ng limang senador na ang Filipinas ay malayang bansa at hindi na kolonya ng Amerika.
Nagpapagamit lang aniya ang limang senador sa mga grupong nais ibagsak si Pangulong Rodrigo Duterte.
Niliwanag ni Panelo ang pagkakakulong ni De Lima ay may kaugnayan sa pagkakasangkot sa operasyon ng ilegal na droga samantala ang kaso naman ni Ressa ay may kaugnayan sa paglabag sa tax evasion law at anti dummy law.
Iginiit ni Panelo, ang ukol naman sa isyu ng umano’y EJKs ay may kaugnayan sa drug war ng pamahalaan at hindi kinokonsinti ng gobyerno ang pagpatay nang walang dahilan.
Karamihan aniya sa mga napatay sa drug war ay pawang lumaban sa lehitimong police operations.
(ROSE NOVENARIO)
